Авваламбор, эҳтирос уйғотадиган аёлларни турмуш қурадиган аёллар билан адаштириб юборманг. Ҳаётини боғламоқчи бўлган аёл ҳам ширинқўл пазанда (эркаклар юраги ошқозонида экани ёдингиздадир), ҳам ширинсўз уй бекаси, ҳам соғлом фарзанд кўрадиган аёл, ҳам болаларига меҳрибон она бўлишини хоҳлайди эркак. Хуллас, бундай фазилатларни санайдиган бўлсак, санаб адоғига етиш қийин. Ушбу мақолада эса эркакларни ўзига тортадиган, жозибали, улар ҳаёлини ўғрилаб, эҳтиросларини уйғотиши мумкин бўлган аёллар қандай бўлиши ҳақида сўз юритамиз.

Ҳар бир одамнинг диди ўзгача. Бу эркакларга ҳам тааллуқли, албатта. Кимгадир малласоч ёқса, бошқаси қоматига учади, яна бири эса қизнинг оёғига назар солади. Аммо бир хусусият борки, барча эркаклар унга сўзсиз итоат этишар экан.

Аргентиналик олимлар ушбу масалани ҳал этиш мақсадида ўрта ёшлардаги кўплаб эркаклар иштирокида тадқиқотлар ўтказишди. Синовдан хулоса шундай бўлдики, аёллар вазни эркаклар учун катта аҳамиятга эга. Тадқиқотлар хулосасига кўра, эркак эҳтиросини уйғотиши учун аёлнинг вазни уникидан камроқ бўлиши шарт экан. Сўралганларнинг жуда кўпи – нақд 89 фоизи ўзидан озғинроқ аёлларга кўзи тушса, эҳтироси жўш уриб кетишини таъкидлашган. Бу ўринда аёлнинг бошқа фазилатларига ҳам эътибор берилган, албатта. Аммо айнан вазни камроқ бўлишини кўплаб йигитлар алоҳида кўрсатишган. Лекин юқорида айтилганидек, бу шунчаки вақтинчалик эҳтирос уйғониши учун, холос. Турмуш ўртоғини излашда, юқорида айтиб ўтганимиздек, эркаклар умуман бошқа мезонларга эътибор қаратишади ва бу ўринда аёл вазни аҳамиятли эмас.